Ka nisur puna për ndërtimin e maternitetit të ri të Lezhës brenda korpusit të këtij spitali rajonal. Ministrja e Shëndetësisë dhe Mbrojtjes Sociale Ogerta Manastirliu, shoqëruar nga Kryetari i Bashkisë Lezhë Pjerin Ndreu, Prefekti i Lezhës Gjokë Jaku dhe deputetja Ardiana Jaku, inspektoi punimet për maternitetin e ri, një investim i qeverisë shqiptare prej 3.2 milionë dollarë, që tashmë ka nisur të bëhet realitet për banorët e Lezhës. “Qeveria shqiptare ka vendosur në prioritetin e saj shëndetin e nënës dhe fëmijës, ndaj rikthehemi në Lezhë me një premtim të mbajtur duke bërë realitet një prej investimeve më të mëdha në dekadat e fundit për shëndetësinë në Lezhë, ndërtimin e maternitetit të ri, me vlerë 3.2 milion dollarë”, tha Manastirliu.
Duke theksuar se ky investim do të transformojë shërbimin për nënën dhe fëmijën për qarkun e Lezhës, Manastirliu tha se ky nuk është i vetmi investim në maternitete këtë vit.
“Pas ndërtimit të maternitetit të Korçës dhe Sarandës, Ministria e Shëndetësisë dhe Mbrojtjes Sociale është duke investuar me fonde të buxhetit të shtetit për tranformimin e materniteteve edhe në spitalet rajonale të Kukësit dhe Beratit, me standardet më të mira të shërbimit shëndetësor, duke garantuar shërbim cilësor për nënat dhe fëmijët sa më afër vendbanimit”, u shpreh Manastirliu.
Materniteti i ri i Lezhës do të ketë mbi 3000 m2 sipërfaqe ndërtimi, godina do të jetë pesë katëshe, katër kate mbitokë dhe një kat nëntokë. Do të ketë 3 salla lindjeje, dy salla operacioni dhe pajisje mjekësore të teknologjisë së lartë.
Gjatë inspektimit të fillimit të punimeve të ndërtimit të maternitetit të Lezhës, Ministrja Manastirliu shoqërohej nga Kryetari i Bashkisë Lezhë Pjerin Ndreu, Prefekti i Lezhës Gjokë Jaku dhe deputetja Ardiana Jaku, të cilët vlerësuan si shumë të rëndësishëm për Lezhën këtë investim të qeverisë shqiptare. Z.Ndreu theksoi se, e premtuam maternitetin, e filluam, dhe jo vetëm atë por edhe një projekt për të gjithë spitalin!

Përgatiti Rrok Lelçaj, Lezhë, 04.10.2019